Panaginip

Dahil malapit na ang Halloween at nagsisimula na ang pagkukwento ng mga nakakatakot na pangyayari, ang isusulat ko ngayong gabi ay tungkol sa isang nakakalokang paniginip ko ilang linggo na ang nakararaan. Bakit nakakaloka? Parang totoo kasi at sobrang natakot ako nang makita ko ito. Ewan ko lang pag binabasa niyo na... Pero eto siya:

Gabi na at walang kuryente. Kaming dalawa lang ng kapatid kong si Ena ang nasa bahay. Nasa garahe siya at may hinahanap sa van habang ako naman ay nasa loob ng bahay, nagsisindi ng kandila. Madilim at medyo umuulan nang gabing iyon.

Ilang segundo ang lumipas at may kumatok sa aming gate. May hawak akong flashlight kaya tinignan ko kung sino iyon. Nakita ko, mula sa siwang ng gate, ang ilang mga taong naka-motorsiklo. Sumigaw ako upang sabihin sa kapatid kong huwag silang pagbuksan pero huli na; nabuksan na niya. Dali-dali akong lumabas ng bahay para puntahan si Ena.

Agad-agad ay pumasok ang mga tao at hindi sila lumalakad. Nagfofloat sila na parang yung mga multong nakikita nating decoration sa mga tindahan. Marami sila at sabay-sabay silang pumapasok sa aming garahe; ala Kitty Pryde ng X-Men ang estilo ng pagpasok. Nakasuot sila ng mahaba at itim na tattered cloak. Nakaalis ang hood kaya nakikita namin ang kanilang mga mukhang napakaputi. Slanted ang kanilang mga mata na parang mga Intsik at walang kilay o pilik-mata. Hindi ko rin napansin kung may pupil sila. Ang paligid ng kanilang mga mata ay may halong pula at puting pintura. Nakanganga sila habang papalapit sa amin.

Nang makita ko ang mga taong ito (kung tao man sila...) ay bigla akong kinabahan. Hindi rin ako makapagsalita ng tuwid. Pero kahit na ganoon, alam ko ang dapat kong gawin. Kahit nanginginig ang buo kong katawan sa takot, iniunat ko ang kanan kong kamay sa direksyon nila at sinabing, "In Jesus' name" ng paulit-ulit. Noong una ay hindi malinaw ang pagkakasabi pero kalaunan, diretso na ang aking pagsasalita at lalo pang lumalakas ang aking boses. Pagkaraan ng ilang sandali, sumigaw ang mga nilalang at umalis na...

Anong masasabi mo?..

"They swarmed around me like bees,
but they died out as quickly as burning thorns;
in the name of the LORD I cut them off."
Psalm 118:12